6歲童幫手拎托盤不慎跌麵包 慘被媽媽連摑2巴委屈爆喊衝出街

小朋友能力不足、做得不好乃是正常，作為家長的理應予以包容及耐心教導。一名6歲左右的男童，日前與妹妹跟隨母親到麵包店時主動幫手拿托盤，但因拿不穩而弄跌了2個麵包，慘被媽媽當場狠摑2巴及斥責。深感委屈的他立即爆喊並衝出店舖，但媽媽竟不理店外車來車往，繼續自顧自地挑選麵包，令在場目擊者無不嘆息。

男童跌麵包 媽媽即出手掌摑

有網民在Facebook專頁「生仔要考牌系列」投稿，指上周日（17日）下午3時許左右，他到屋企樓下麵包店買麵包時，看到一名媽媽帶同分別年約6歲及4歲左右的子女挑選麵包，「哥哥主動要求幫媽媽拎個托盤，媽媽即刻將個托盤畀咗個仔拎。老實講，嗰個麵包托盤對於一個6歲左右嘅細路嚟講唔算容易拎，更何況目測盤上面擺咗3至4件麵包。果然唔夠10秒，個小朋友整瀉咗2件麵包落地下，佢媽媽見到後諗都唔諗即刻打咗個仔2巴，之後講:『都話咗你拎唔到啦！』」

男童爆喊衝出店 媽媽望都唔望

他續指，該名男童被媽媽掌摑及大聲斥責後，感到委屈大哭並衝出麵包店，「麵包舖出面就係馬路嚟，都有好多車出入，媽媽竟然望都唔望個仔，淨係一手搶咗個托盤繼續揀麵包，反而其他客人同老闆娘仲比佢自己關心個仔嘅安全。」老闆娘見狀後，連忙稱「唔緊要」及表明不收錢，並叫職員將地上2個麵包掃走；然而，該名媽媽似乎未有領情，「個媽媽係由頭到尾一句道歉都冇，繼續揀完之後畀錢就拖住個女嬲爆爆走。離開間舖時，個仔喊住跟佢尾。舖頭裏其他人不禁搖頭嘆息。」

網民：將來唔好呻仔女冷淡

此事引來網民熱議，不少人認為該名媽媽十分有問題，「個仔想幫手，執到啦」、「好多時候啲所謂大人就覺得係貪玩」、「冇㗎啦，以後唔會再幫」、「跌咗咪執返囉，大人都會整跌嘢啦，唔通大人自己摑自己幾十巴？」同時，有網民表示：「既可以俾小朋友學習，又可以滿足到小朋友有成功感，真心唔明點解又要生佢出嚟但又要打佢。將來呢位X母就唔好係度呻點解啲仔女對佢咁冷淡乜乜乜...」

此外，亦有網民分享自己的教子經驗，認為家長應要讓子女慢慢嘗試，「好多父母就係怕小朋友失敗，唔畀佢地試，其實結果其次，過程中學到嘢先重要。我仔5歲未夠已堅持乜都自己來，斟水，捧餐等，有倒瀉有跌嘢，但佢試過失敗先識掌握竅門，而家5歲幾食自助餐都係自己拎嘢食。」