沙田馬場同樂日 一家大細寓學於樂

復活節想「放電」，一於帶小朋友去沙田馬場同彭福公園參加「同心同步同樂日」啦。下個月19至21日期間，彭福公園將變身馬術俱樂部，小朋友有機會同雪特蘭小馬合照，仲可一嘗策騎樂趣。今年仲有大型STEAM工作坊舉辦，畀一家大細發揮創意整手工藝品，寓學於樂。另曼聯名宿高爾（Andy Cole）到時都會現身，各位球迷要留意了。

公關姊妹提黛安，同樂日門票下周一（25日）開始發售，售價由40至60蚊不等；今年仲會有成千名學生合力挑戰「最大規模的摺紙課」嘅世界紀錄，黛安都預祝佢哋馬到功成先。