亞洲少年田徑錦標賽 港隊揚威奪1金2銀

由Panasonic同屈臣氏集團主力贊助嘅「第三屆亞洲少年田徑錦標賽」啱啱喺前日（17日）完成所有賽事，港隊喺中、日、韓等31支勁旅中脫穎而出，成功勇奪1金2銀，包括韋祺嘅女子1,500米賽事嘅金牌、馮俊瑋嘅400米欄銀牌，同埋黎恩熙嘅女子跳高銀牌。

公關姊妹話，睇到港隊喺3日賽事最後1日「大爆發」，成功攞牌升上獎牌榜第8位，都覺得好激動。韋祺奪冠後更形容係「完美結局」，因不但以4分34秒04成績攞到冠軍，仲打破咗自己嘅個人最佳時間，非常意外。佢仲好多謝香港觀眾同佢打氣，令佢喺最後100米發力壓倒對手。香港業餘田徑總會主席關祺話，未來仲想搞多啲國際賽事，等香港田徑運動員喺主場發揮。