關愛座屢釀紛爭變批鬥座 九巴發文：有需要就可以坐

淪為「批鬥座」的「關愛座」不時引起爭議和風波，早前更有學生哥因此而被大叔喝罵。對於種種事件，九巴昨晚在Facebook專頁發文，指出關愛座原意是讓有需要的人士坐；如果沒人有需要，任何乘客坐下亦無妨。

九巴以「關愛座有需要就可以坐」為題發文，表示：「自關愛座推出以嚟，社會一直存在好多唔同嘅聲音。其實學識尊重很重要，關愛座嘅原意就係讓畀有需要嘅人坐，不論係身體唔舒服、長者、孕婦、抑或殘障人士等等。大家有時候都會有身體唔舒服想休息嘅時候，肉眼睇唔見但唔代表佢冇需要㗎！如果咁啱冇人需要坐，大家其實坐下都冇問題㗎！今日起，不妨關心身邊嘅人多啲啲！」

而九巴亦在文中的Hashtag，指出「#寶寶很累但寶寶不説」、「#如果你知我苦衷」、「#大人細路有需要都可以坐」、「#優先讓畀有需要嘅人」、「#相嗌唔好口」、「#世界上最大嘅空間就係進步空間」。

{{hket:inline-image name="bus210220193.jpg"}}{{/hket:inline-image}}

此文引來大批網民回應，不少人表示認同，「的而且確多次覺得頭暈同腳痛明明見到有位都唔去敢坐」、「呢篇文章要貼落巴士車廂內當眼位置」、「讓座是發自內心而不是強制性行為」。另有網民建議取消關愛座，「取消咗佢啦，費事咁多爭拗」、「其實不論有無或者果個係唔係關愛座，自己情況許可都可以讓位俾有需要既人㗎！」、「取消啦，有心讓點都會讓，多此一舉」。更有網民表示：「不如咁啦！而家巴士啲mon都無點用，播返啲搭巴士知識，教育下落車要預早㩒鐘嗰啲，上層唔企得等等。」

據了解，無論是在巴士上，抑或是在港鐵車廂內，「關愛座」都不時引發風波，單在本月便已發生至少3宗同類事件。本月中，一名年輕男子搭港鐵時坐關愛座，後來有名老翁上車叫他讓座；男子抬頭時雙眼發紅稱「我份工企咗成日啦」，惟老翁以「後生仔企下無所謂」作回應，最終男子旁邊的女士讓座予老翁。另日前，亦有一名西裝男搭輕鐵時，被迫讓座予婆婆。前日，更有一名學生哥讓出關愛座予其他乘客後，仍被大叔喝罵「關愛座唔係畀你坐，你有冇我咁大年紀呀？」等說話。