互動體驗明日生活 認識大灣區創科發展

最近大家都談論緊啱啱出爐嘅《粵港澳大灣區發展規劃綱要》，黛安當然都有緊貼時事啦，仲知道創科香港基金會同埋騰訊公司將會喺下個月1至3號喺apm大堂舉辦「明日生活x創科大灣」展覽，等大家可以深入了解粵港澳大灣區，同時認識大灣區創科嘅最新發展。

公關姊妹同黛安講，為期3日嘅展覽除咗介紹大灣區同香港喺大灣區嘅角色同機遇之外，仲邀請到借助大灣區優勢發展嘅11家創科公司，用互動體驗，加遊戲形式展示佢哋嘅最新產品同技術，包括由思路富邦研發，融合咗人工智能影像分析技術嘅「智能姿勢分析系統」；仲有由Miscato Limited研發，可擺放5款精油、唔使加熱加水、可用手機應用程式操控嘅「智能香薰機Aromeo Diffuser」；現場仲會有「快閃商店」，同埋喺眾籌網站籌募資金研發同生產嘅「對戰機械人」；環保方面就有「智能塑料瓶回收機」。

內容真係好豐富而且多元化，仲係免費入場，黛安已經準備好約埋班姊妹一齊去現場先「玩」為快喇！