夥「學校起動」計劃學生 吳光正跑領袖杯撑渣馬

體育界年度盛事渣打香港馬拉松噚日順利舉行，黛安都有參與，見到多個政商界名人現身參加1.8公里嘅領袖杯支持賽事，包括九倉前主席吳光正（Peter），仲有同佢一手創立嘅「學校起動」計劃學生盧榮杰，齊齊落場參加領袖杯。

睇到Peter做熱身運動時，身形真係fit爆，腰板夠直，點睇都唔似已經72歲，一定係同佢平日鍾意游水、潛水、滑雪、打網球同跑步有關。聽公關姊妹講，Peter完成1.8公里時間嘅成績，同佢2013年參加時相若，只係花咗11分鐘咋，同佢一齊跑嘅17歲盧同學亦不遑多讓啊，簡直就係運動健將！姊妹仲話，其實Peter噚日身體有少少抱恙，但仍然親身落場參賽，希望鼓勵同學，人生不一定要贏在起跑綫，最重要係認清目標，努力不懈。

黛安知道，渣馬今年仲新增「一帶一路」做主題嘅賽事，邀請咗「學校起動」計劃（Project WeCan）內15位嚟自一帶一路國家，包括埃及、也門、越南等嘅少數族裔學生參加，非常有意義。

姊妹話，「學校起動」計劃喺2015年開始，每年提供獎學金畀計劃學校嘅同學，等佢哋喺8間由大學教育資助委員會資助嘅專上學院同香港演藝學院，修讀4年學位課程。

按照計劃，同學每年可獲得最高2.5萬元獎學金，就讀期間亦要保持良好成績，先可以持續領取獎學金㗎。

另外，獎學金得主亦會獲邀參加「學校起動」計劃同學會擔任義工，積極參加活動和公益事務，回饋社會。黛安知道，截至目前為止共有131位參加計劃嘅同學獲發獎學金，真係令人鼓舞！