依家正值冬季流感肆虐期，好多市民會去公立醫院求診，前幾日伊利沙伯醫院及聯合醫院急症室等候時間更一度長達6個鐘，令前線醫護人員需要1個對10個病人，壓力爆煲。不過有個男護士反而覺得唔辛苦，仲將壓力化做動力來源，非常有使命感。佢，就係江華同麥潔文嘅25歲寶貝仔──Bryan陳耀淙。
▼click以下link知多啲啦
講起星二代，大家可能會有刻版印象，覺得佢哋「屋企肯定好多錢」、「唔使做嘢，可以吃喝玩樂」、「喺人哋面前好要面」等等，但Bryan好唔同，佢俾人嘅感覺係好成熟穩重，有自己一套睇法嘅人。細細個開始，呢種無形嘅壓力已經跟隨佢長大，Bryan覺得好大負擔，加上佢咁啱都冇遺傳到父母嘅唱歌天份、演戲天份，所以畢業後寧願投身醫護界親身為市民服務，都唔想跟隨父母步伐做明星。相比起入行，Bryan覺得醫護行業更加適合自己：「我做護士係諗呢份工究竟可以做幾耐呢，可唔可以養到我屋企人，夠我結婚。我唔諗發達，夠食就夠喇！我應該做緊啲大家都認為係正確嘅嘢，冇丟我父親嘅架。」
講起久未於幕前露面的爸爸江華，Bryan一臉崇拜：「我覺得我爸爸好靚仔，愈老愈有味道，喺企邊度邊度就係中間，我企隔離就永遠都係側邊。佢有霸氣，但唔係惡。」在他眼中，江華現實中同戲裡面的角色大相逕庭，《九五至尊》裡面的李大蝦是風趣搞笑，但回到家中江華就好嚴肅。至於媽媽麥潔文，Bryan就話媽媽沒錯是唱歌勁，但廚藝卻不敢恭維：「好容易煮到爛晒嘅薯仔、番茄、南瓜，全部煮埋一碟倒落個飯度...」雖然一家三口好幸福，不過Bryan就話自從妹妹出世之後，父母就開始偏心，更重提當年無得去沙灘的事：「嗰陣其實我喺屋企瞓緊覺，佢哋3個就出咗沙灘玩冇預我！」
其實唔知Bryan年齡，仲以為佢已經出嚟社會做咗一段長時間，因為佢對前途好清晰，講到明35歲應該會成家立室，仲預想第日應該係一對孖女嘅爸爸：「一定會對佢百般呵護，好好嘅生活、開心嘅回憶，先係做爸爸應該做嘅嘢」就咁都已經聽得出Byran嘅愛心湧晒出嚟。雖然遺傳唔到父母嘅唱歌天份同演戲天份，不過佢有樣嘢好似父母，就係有承擔、有目標、肯盡責任，果然係個唔平凡嘅星二代。
感謝場地提供：
All In Burger & Bar
Shop B, G/F, Sun Chun Building, 4A-7 Sun Chun Street, Tai Hang
Unar Coffee Company
G/F, 4 Second Lane, Tai Hang