【大掃除秘訣】DIY達人傳授梳打粉除污13招 秒速清走花灑頭浴缸污垢

年廿八、洗邋遢，近日人人忙於大掃除迎接新一年，陳年頑垢確令一眾主婦非常頭痕，但原來梳打粉是「清潔神器」，可助你清除家居污漬時事半功倍，今次裝修佬的DIY導師「裝修東尼」整合梳打粉妙用，清潔浴室、廚房無難度，13招清潔秘技如下：

1. 清潔瓷磚同未打蠟嘅地板

要清潔瓷磚同未打蠟地板，可以將半杯梳打粉加入暖水中，將抹布或拖把浸入梳打粉水中，扭乾後拖地板，再將拖把以清水洗淨，重覆拖1、2次即可。 

2. 清理花灑

去除花灑上積聚嘅礦物質，令花灑出水更順暢。將半杯梳打粉、1杯醋倒入膠袋混合，然後將膠袋套上花灑頭，以橡筋紮實，等花灑浸入溶液。靜置浸1個鐘後移除膠袋，出熱水讓花灑持續噴幾分鐘。

3. 去除瓷磚頑固水漬或鏽漬

梳打粉可以去除瓷磚上嘅頑固水漬或鏽漬，使用百潔布抹，然後徹底沖洗。 

4. 清潔浴缸

梳打粉可以用來清潔玻璃纖維製成嘅浴缸，不過需要小心，因為玻璃纖維容易劃傷，應該用海綿沾梳打粉同洗潔精調成糊狀物輕擦。 

5. 除味

將梳打粉放入舊襪或絲襪嘅趾尖部位紮緊，將多餘部分剪走，將其掛於水喉上可以除味。於水箱上放一個裝有梳打粉小盤，效果即等於在廁所放置永久性空氣清新劑，或可以加入浴鹽，每3個月更換一次。有霉味浴巾可以用洗衣機清洗去味，只需於清洗時加入半杯梳打粉即可。 

6. 去除浴簾上霉漬及輕度污漬

於海綿上灑梳打粉來清洗浴簾，可以清除霉漬並去除輕度污漬，然後用水將浴簾沖洗乾淨。 

7. 清潔枱面

用梳打粉同白醋調成糊狀，可清潔檯面同浴室櫃的大理石表面。 

8. 去除浴缸、洗手盆水垢

對於浴缸同洗手盆中積聚嘅水垢，可以將1/4杯梳打粉、半杯醋、1杯氨水同大約4升暖水混合，將其混合好後大量用於污垢處便可。 注意，清洗過程須戴手套，並保持空氣流通。 

9. 去除浴缸防滑條污漬

要去除浴缸防滑條污漬，應將要清潔部位整濕，然後灑上梳打粉，靜置20分鐘後抹乾淨，隨後用水沖走。 

10. 清除馬桶的頑固污漬

清除馬桶頑固污漬，可用細鋼絲球加梳打粉。 

11. 去除水泥霉漬

將梳打粉糊敷於污處，用舊牙刷刷洗，然後用水沖淨。 

12. 清潔電器

電磁爐、微波爐用耐咗都會有異味同食物造成嘅痕跡，用沾有梳打粉水嘅抹布抹幾分鐘，再用乾淨濕抹布抹，就可以去除掉污漬。

13. 令植物更光鮮

將梳打粉水噴係植物葉上後用濕布抹，葉片就會顯得光澤，而將水同梳打粉以2：1比例倒入花盆中再將花插入去，可以讓鮮花綻放持久。

文章獲裝修佬授權轉載，標題及導言由《晴報》編輯所擬。