貴為亞洲男神嘅天王木村拓哉雖然只係年屆46歲，但被網民指同68歲嘅行政會議成員兼資深大律師湯家驊撞樣。近日佢同天后王菲個大女，22歲嘅竇靖童（童童）首次合作拍牛仔褲廣告，只見佢雙手仲有好結實嘅肌肉，同童童不知幾襯，正好為自己平反！其實15年前木村曾經同過王菲合演港產電影《2046》，估唔到事隔多年竇靖童有機會同木村合作，真係好神奇。連木村都話：「我跟她媽媽合作過，現在就跟她合作，感覺很親切，勾起不少回憶。」，唔怪之得佢哋拍完廣告都咁老友。最估唔到導演王家衛睇完廣告勾起回憶，喺微博上載木村同王菲喺《2046》未曝光過嘅熱舞片段，勁珍貴！
(王家衛微博截圖)
童童獻出第一次 難忘木村溫柔鼓勵
廣告中童童先向木村挑釁，笑佢係咪好耐冇跳舞，木村一聽到即刻除黑超興起，同佢喺JR車廂埋身鬥跳舞。正人隨住音樂節拍跳到忘晒形。之後木村壁咚童童，仲用手摸佢頭髮，關係撲朔迷離。不過最後童童推開木村，兩個人繼續跳舞，鬥到難分難解。
唔講唔知，原來童童真心係完全唔識跳舞，係今次為木村豁出去，獻出螢幕第一次。雖然全程都幾驚，但好彩有木村勁溫柔咁打氣先完成到：「收到跟木村合作的邀請時感到非常驚訝及驚喜，畢竟對方是紅遍亞洲的天王，跟對方成為大使很榮幸！料不到導演突然要我們各自多跳一段solo，那刻我便傻了！我在這方面沒有經驗，只是拍攝前一日花了2小時學幾次，壓力好大。但木村前輩好親切，非常照顧我：『你就跳吧！』」
(廣告截圖)
(木村微博截圖)
型爆木村回復昔日靚仔樣 盤點五大無添加男神
木村今次握住扶手吊環360度轉咗個後空翻，啲肌肉爆晒出嚟，唔單止童童都睇到拍晒手拳，好多網民亦紛紛讚木村寶刀未老，仲係咁靚仔：「搵佢個女光希仲正啦，個like俾木村嘅」、「木村一個無加工男神已經夠撐，邊個話佢老！」除咗木村之外，其實仲有4位同樣無添加嘅天然男神，無論20歲定40歲都仲係咁型，證明唔使微調、唔使整容，喺今時今日仍然可以迷倒唔少少女。
(廣告相)
(廣告相)
1. 梁朝偉
直到依家無論3歲定80，梁朝偉依然魅力非凡。雖然佢已經年屆56依然好童顏，不過童顏之餘又歲月留下嘅皺紋，證明係天然男神，所以中港網民都大讚：「唔整容唔打針嘅臉睇落就係舒服」。
2. 方中信
現年55歲嘅方中信由細到大已經因為靚仔樣，俾人叫做「香港李察基爾」、「師奶殺手」。入行做演員多年，佢個樣一直冇咩轉變，雖然比以前多咗少少白頭髮，但反而更加有男人味。
3. 金城武
45歲嘅台日混血兒金城武係出咗名嘅型男，自小已經遺傳父母，輪廓好深，直到依家都依然keep到靚仔樣，所以好明顯係冇整過容嘅。
4. 吳彥祖
同金城武被譽為港台兩大男神嘅吳彥祖近日一個廣告撳起全城熱話，大家都話44歲嘅彥祖雖然髮線開始向後，不過仲好man，相反旁邊嘅後生16歲嘅大陸代表鹿晗就俾人笑似女仔。