香港講「上車」非常奢侈，本地住宅一向以極高呎價見稱，對人工追不上通脹的年輕人來說很難負擔樓價。為教觀眾買樓竅門，ViuTV真人騷新節目《買樓狂想#曲》邀請主持火火 (李家榮)與3位年輕人阿Bu、Gene、肥利到處參觀不同質素的樓宇。近日節目就引來網民激烈討論，原來樓盤明明十足十打仗後的亂葬崗，竟然都被地產經紀捧到天上有地下無的天堂，搞到火火忍唔住話：「垃圾站都值400幾萬」。不少網民睇完都非常感歎：「瞓廁所都得，呢啲小兒科」、「香港變成咁已經唔係第一日嘅事」。
市中心筍盤原來是舊區爛樓
一開始地產經紀陳先生笑笑口話市中心有筍盤，怎料火火他們一到埗即嚇窒，原來所謂的「筍盤」是位於九龍舊區的爛唐樓，不但要行樓梯上去，裡面更加凌亂不堪，滿佈裂紋。雖然實用面績都有420呎，又有房間間隔，不過要數缺點數到第二朝都未數完，例如牆紙發霉、石屎剝落、鋼筋外露等，仲要開價440萬，還未計之後大裝修的成本！搞到火火都忍不住話：「呢度一睇就知道啱啱打完仗嚟喎！」，但經紀也不是省油的燈，居然經驗老到地「秒答」：「方便啲裝修師傅裝修嗰陣唔使煩啊嘛！」跟住火火繼續兜個圈暗諷樓盤似亂葬崗：「我覺得方便我哋執槍，執完槍，上子彈就『食雞』喇，你睇吓地下仲有個煎pan，仲唔係用嚟擋子彈？」經紀聽罷不知道是否心虛，仲一邊滴汗，一邊堅持hard sell:「算抵㗎喇！呢個（石屎剝落）style嚟㗎，特登㗎！特登㗎！裝修完就好靚仔，你會睇到個反差」，嘩，經紀個藉口夾硬咗啲喎。
(ViuTV電視截圖)
(ViuTV電視截圖)
(ViuTV電視截圖)
(ViuTV電視截圖)
(ViuTV電視截圖)
(ViuTV電視截圖)
(ViuTV電視截圖)
當中兩個想買樓的年輕人又點會受落？當堂耍手擰頭拒絕落疊，唯獨Gene就話物超所值：「400幾萬買呢度冇問題！」，經紀聽到有人撐自己即伸出友誼之手大讚他有眼光。表面上一臉認真的Gene似乎癲咗，事實上他言語間暗寸樓盤爛到隨時倒塌，分分鐘死人，好危險：「真係有潛力啊你睇吓，佢冧咗政府仲賠得多添啦，ok啊！」講真層樓不是殘，是爛，火火形容殘的程度應該可以媲美阿富汗加敘利亞的戰地環境。
(ViuTV電視截圖)
窗口對垃圾站被經紀力捧 火火無奈暗諷香港人之苦
一轉眼經紀走到房間窗前繼續推銷，大讚景色夠開揚、好「綠色」，可是眼前的景色既不是花園，又不是深山密林，而是...人人高空擲物堆滿垃圾的平台。原來經紀口中所指的「好綠色」是長在簷篷上面的青苔，聽到這裡火火眾人已經翻白眼兼嘔血：「潛行凶間？如果要捉姦，姦夫可以即刻跳出窗喺簷篷度逃走。」可是經紀沒有放棄，繼續好認真咁落力hard sell：「拿如果新樓就冇呢度咁大㗎喇，所以呢個盤好難搵㗎。你哋想上車，又想大，呢度fit晒㗎喇」最後火火為樓盤做總結，暗諷做香港人認真辛苦：「我能夠喺香港見到呢啲質素都能夠賣400幾萬，香港係幾咁繁榮、安定...係驚一件事，自己買唔買得起。但買唔起唔緊要，又提自己垃圾站都值400幾萬，我有咩驚啊？」，完全表現出後現代浪漫悲情那種哀傷感。
(ViuTV電視截圖)
(ViuTV電視截圖)
(ViuTV電視截圖)
(ViuTV電視截圖)