全球首間朱古力便利店 海港城送你甜蜜情人節

下個月就係情人節啦，大家諗好同情人去邊度慶祝未？聽公關姊妹講，海港城會喺今日起至2月17號，舉辦「情‧尋朱古力」活動，為大家帶嚟全球第一間朱古力便利店《ChoConveni》，有得買又有得食，包你另一半有讚無彈！

姊妹話，便利店特別喺世界各地搜羅過百款CAN EAT，同CANNOT EAT嘅朱古力和精品，CAN EAT嘅已經有50款獨家朱古力啦；仲邀請KIT KAT®設置「Create Your Own KIT KAT®」Pop Up store，提供全港首個自訂「KIT KAT® MY BREAK」服務，影完相後可以設計出獨一無二嘅KIT KAT®包裝，即場送畀男女朋友，Sweet到爆啊！

情人節除咗朱古力，又點少得花呢。美國時裝品牌kate spade New York和意大利鞋履品牌Sergio Rossi，會開設期間限定花店，只要憑消費單據就可以即場換領或選購花束。