食住《大帥哥》氣勢 張衞健再做孫悟空

由張衞健主演的《大帥哥》不單在港掀起熱話，在內地亦刮起一股旋風，短短日子網上點擊率已衝破二億大關，令張衞健又再一次變成會生金蛋的鵝，成為多間製作公司獵物，有人仲打佢套經典作《西遊記》主意，計劃開拍網絡電影《西遊再鬧天宮》，而據最新曝光的資料顯示，張衞健唔止將再次飾演孫悟空，仲會做埋六耳獼猴，一人分飾兩隻馬騮精，到底係乜嘢玩法？而內地演員聶遠就飾演唐三藏，至於元華就會做菩提老祖，劇情圍繞孫悟空成為戰鬥佛之後的故事。

雖然有張衞健歸位，令電影吸引力大增，不過就有網民擔心近年內地的災難翻拍潮，如《新六指琴魔》、《新神雕俠侶》等有辦你睇，被人插到開花，今次再拍《西遊記》分分鐘變成毀滅經典，令張衞健嘅金漆招牌渣到無，難怪唔少人都叫佢三思先好呀！

{{hket:inline-image name="e.jpg"}}{{/hket:inline-image}}