蕭正楠與黃翠如拍拖4年，常常高調晒恩愛，雖然多次傳出婚訊，不過他們每次都否認。直至昨晚，蕭正楠終於忍唔住趁《萬千星輝頒獎典禮》宣佈已婚，又當眾向黃翠如表白：「多謝你令我學識去照顧人，令我學識做個更加好嘅男人。」，掀起全晚高潮，藝員同事都驚訝到O晒嘴。蕭正楠更笑言事前女方並不知他會公開婚訊，難怪搞到翠如BB都當場喜極而泣，他又透露兩人於今年4、5月在新西蘭註冊。由螢幕情侶進化成網民公認最甜蜜的情侶，究竟這些年間，黃翠如用甚麼方式收服蕭正楠，令他對自己死心塌地？
夠單純傻瓜
黃翠如出名是傻大姐，性格可愛率直，深深吸引當時合作拍攝《師奶Madam》的對手蕭正楠。儘管二人矢口否認撻著，但蕭正楠仍忍不住大讚翠如好單純：「佢係宅男女神，我都係宅男嚟，咁純嘅女仔好少見，係純得好交關。」正式公開戀情之後，他們愈愛愈高調，蕭正楠每次提起翠如個樣都甜到漏，並多次力讚她：「佢係唔能夠錯失嘅好女仔！」但原來第一次求婚，蕭正楠是失敗收場，事關翠如BB實在太純太可愛喇！話說當日兩人玩全歐洲最快過山車，本來蕭正楠已拿出戒指，豈料翠如太驚堅持不開眼，結果令計劃失敗。就連於新西蘭註冊，亦鬧出連串笑話，翠如拿着結婚申請書，竟然去錯刑事法庭排隊，蕭正楠憶述時又甜笑：「佢真係太可愛，係一個好女仔！」
夠專一
「富家千金」黃翠如家境富裕，其父是上市公司主席黃永華，而蕭正楠只是小康之家出身，不過她毫不介意，反而頻頻高調示愛，由拍拖開始已認定對方為終生伴侶。初時網民都指黃翠如與洪永城才是一對，為免蕭正楠擔心及介意，黃翠如特意在社交平台上寫潮文澄清二人只是朋友關係，大派定心丸。而且翠如更早已擺出非君不嫁姿態，如有一次在節目中，蕭正楠被主持夾攻，要他拎出求婚戒指即場求婚，又叫二人去紅棉道註冊，蕭正楠表現尷尬，反而黃翠如就露出一顆恨嫁的心，當時已有不少網民認定翠如BB做硬蕭太。
夠愛心
黃翠如一向熱心慈善工作，不時遠赴山區探訪，深入探訪貧窮農戶，體驗尼泊爾貧農的慘況。早前黃翠如又隨宣明會去孟加拉，以助養人身分探望6歲助養女兒芭依及11歲助養兒子拜諾，買了很多物品給他們。黃翠如指自己猶如當了媽媽：「我有少少做媽媽感受，見到真人先發現6歲女兒只有3歲高度，11歲兒子都好矮，可能因為經濟唔好，每日只可以食一餐，所以離開佢哋嗰陣好難過，為佢哋好多擔憂。」他更以自己做榜樣，叫蕭正楠一齊助養兒童。
唔港女
入行多年的黃翠如一直希望靠自己能力上車買樓，甘願與蕭正楠共同儲錢結婚，所以她平日生活節儉，洗費好少：「相處好好、簡單平實而開心，咁咪夠囉。」而昨晚公佈婚訊後，黃翠如更在instagram透露原來當日蕭生求婚，連一隻婚戒都無：「沒有衣香鬢影，沒有氣派場地，就連一對合尺寸的戒指也找不到，然後我們在一個鄉村小市集，找到一對用餐具弄出來的小戒指。那一刻我們什麼也沒有，但我們擁有了對方。我們給對方的是陪伴的承諾。沒有奢華的浪漫，但足夠。」睇見最近有報道話男人買婚戒，價錢最起碼是自己月薪的三倍，就證明娶到翠如BB呢個老婆，蕭正楠有幾幸福。