今屆視后主要是黃智雯、陳煒及李佳芯之爭，本來先拔頭籌獲得星馬兩個視后寶座的黃智雯獲睇高一綫，結果由次熱李佳芯上位首奪視后！2012年由有線過檔TVB的李佳芯備受力捧，晉身當家花旦，今年《BB來了》贏盡口碑，成功引起不少話題。身為女神的Ali化身為新手媽媽，由意外懷孕到患上產後抑鬱，再到婆媳關係出問題，將媽媽的不安、緊張演繹得恰到好處，角色貼地入屋，不少觀眾盛讚她演技大躍進。
李佳芯對於自己攞獎似乎都好意想不到：「多謝珍姐，珍姐就係喺我最想放棄嘅時候撈返我出嚟，所以拍咗《BB來了》，多謝小姐，每次同你傾計我都獲益良多，多謝Felix好多謝你對演員嘅體諒同埋尊重，多謝每一個用過我嘅監製，因為你哋肯用我肯試我，可以成就今日我依家企喺呢度， 我要多謝一班允豬，無咗佢哋根本拍唔成BB來了，其實佢哋先係最受大家嘅鍾意，我希望你哋可以快樂成長。
我想講其實我唔係一個贏在起跑線嘅人，我從唔知道咩係前人種樹、有庇蔭嗰種感覺我唔知係點，但我只係一嚿飯，只可以好努力咁靠自己做好每一個角色，做好眼前每一樣要做好嘅嘢，我淨係知道我要成功只可以靠我自己，所以如果大家行到好攰好氣餒嘅時候，希望你記住其實唔係得你一個，其實好多人都係默默咁行緊呢條路。我好多謝我劇中嘅老公黎諾懿，因為佢係一個好好嘅拍檔，好好嘅朋友，我朋友唔多，但每一次我拍劇都識到一啲真心嘅朋友，多謝你地。我好想多謝我屋企人，媽咪爹哋阿哥今日都嚟咗。我想講我最感恩嘅係你哋可以見證到我事業上最高嘅時候。我唔係好叻我做任何角色崗位都仲有好大進步空間，我希望大家可以俾啲時間我繼續進步，會有更好嘅Ali，多謝大家。」
▼李佳芯完美演繹新手媽咪感受，原本一個女強人，為了BB放棄一直所追求的一切，非常偉大