勇奪金獎 創最年輕獲獎紀錄 5歲港小畫家揚威國際

香港小朋友向來聰明伶俐，最近又出多一個港產神童喇！黛安收到風，最近有位年僅5歲、讀緊幼稚園K3嘅小畫家陳溥治，憑一幅《星際狂想曲》畫作擊敗來自全球35個國家、4,141名18歲以下嘅小朋友，喺一個名為「2018聯合國和平與合作校園獎」嘅國際賽事中，勇奪初級組「聯合國和平與合作繪畫金獎」，創下比賽舉辦36年來最年輕嘅中國及香港學生獲獎紀錄，揚威國際！

黛安知道，呢個「2018聯合國和平與合作校園獎」係由聯合國外太空事務廳（UNOOSA）、聯合國和平與合作基金會、塞浦路斯政府同西班牙駐塞浦路斯領事館聯合舉辦，本年度比賽主題係「和平的銀河」，希望透過藝術創作，等全球18歲或以下嘅兒童同青少年發揮創意同想像。

勢估唔到，喺競爭咁激烈嘅情況下，來自香港、今年只得5歲嘅陳溥治，憑畫出太空人搭着火箭到太空漫遊嘅《星際狂想曲》殺出重圍，勇奪金獎，仲獲聯合國和平與合作基金會主席Joaquin Antuna大讚係一個想像力非常豐富嘅天才小畫家，作品令大家感受到人類最純真嘅追求和願望。

作品於逸峯廣場港灣豪庭廣場展出

黛安仲知道，溥治嘅得獎作品現正喺塞浦路斯嘅帕福斯藝術學院做緊大型公開展出，供全球熱愛藝術創作同科學嘅人士欣賞，齊齊交流對和平嘅睇法。

睇到呢度，大家係咪都好想欣賞佢嘅作品？聽公關姊妹講，逸峯廣場同港灣豪庭廣場即日起至出年元旦，就會展出溥治同佢曾贏得多個國際繪畫冠軍獎項嘅9歲哥哥陳永治，一齊以「童夢世界」為題創作嘅多幅畫作，大家唔好錯過喇。