「雄姐」張彥博憑《跳躍生命線》人氣急升，更獲提名最佳男配角，不單網民視他為得獎大熱，就連贊助商都睇中佢嘅吸金能力，出錢出力請張彥博再踏舞台，聽日佢就會喺九展Star Hall開騷。
其實38歲的張彥博入行13年，曾經組成樂隊「赤子」，不過一腔熱誠不能裹腹，當時他窮到三餐食公仔麵食到入院，搭車都要問人借錢：「試過銀包連一百蚊都冇，食魚蛋同燒賣當正餐，嗰陣屋企人有時會擺少少車馬費喺屋企。」，差點連命都冇，最後卻被逼解散。如今再次踏上舞台，一圓唱歌夢，張彥博非常感觸：「20年前啱啱學識自彈自唱，當日商場舞台只有3個位，依家台下可以企到3000人！」
開演唱會咁大件事，《跳躍生命線》一班演員都很支持，早就向TVB攞假捧場，當中何廣沛、郭子豪、羅天宇甚至會同張彥博一齊上台表演，以「跳躍F4」的造型重現大家眼前。可能有些人不知道甚麼是「跳躍F4」，話說早前他們扮台灣F4惡搞《流星花園》經典MV，不論氣質、唱功、特效都屬高汁之作，連特效、鏡頭角度、動作都好完美咁翻炒個MV，結果條惡搞片一出即大受歡迎。四個之中郭子豪扮美作最頂癮，除了百分百還原美作個負離子頭，仲矇住雙眼瘋狂搖擺個頭，睇怕演唱會當日不少粉絲會想向他掟雞蛋。對於得到好兄弟支持，張彥博都顯得好興奮：「佢哋個個都玩嘢，冇一個最成熟，不過佢地呢幾個係我今年好難得有套劇結識到嘅兄弟，大家好夾！星期日會有4個靚仔出嚟同大家見面！」到底佢哋跳躍F4嘅演出有幾爆笑？四人之中邊個最多女粉絲？到時自有分曉！
▼當時有網民睇完大叫想掟爆手機：「因為呢條片，我笑到先後把Galaxy Note 9, LG V20, Galaxy Note Edge, 小米2S及Nokia N8(S60)先後扔爛，而家焗用Nokia 5730打字咋，陰功」
▼郭子豪又幾有喜劇細胞，絕對有潛質向喜劇演員進發！