《跳躍生命線》憑著賺人熱淚的感情線與複雜細膩的伏線贏得觀眾追捧，當日大好人雄姐張彥博慘死，更加連續幾晚成為討論區熱話。雖然播完後很多人大呼不捨，不過最近他們竟以另一個形式回歸，原來其中兩個主角郭子豪與何廣沛拍住上《美女廚房》。二人戲中兄弟情深，現實中亦不時互窒對方，感情好到猶如一對小情侶，當郭子豪見到何廣沛同余潔瀅玩曖昧，馬上醋意大發，主動親吻何廣沛，爆出連場笑料。
郭子豪何廣沛做助手愈幫愈忙
今集《美女廚房》是美女學徒畢業試，她們終有機會由佈景板「升呢」做主角，經過一輪惡鬥，三位學徒伍樂怡、余潔瀅與邱晴晉級決賽，節目請來郭子豪、何廣沛與王梓軒做們的助手，用沙巴龍躉煮出聯誼餐。一開始王梓軒認真有男人味，第一時間幫邱晴安撫條魚，相反伍樂怡要捉魚時，郭子豪即彈到老遠，怕她的手會沾濕自己；而何廣沛仲衰，做花生友在余潔瀅旁邊不斷打氣，見到她成功把魚放在砧板上才敢上前合照。
之後郭子豪繼續攪攪震無厘正經，被伍樂怡嫌棄手腳慢，他更誇張到連薯仔、意粉都分唔到，主持林盛斌都不禁嘲笑他在健身時被啞鈴撞到腦袋。郭子豪見自己幫唔到手，於是瘋狂出口術讚伍樂怡厲害、靚女，甚至為她抺汗，希望幫自己加分，當眾人懷疑他們有特別關係之際，郭子豪竟煞有介事叫大家守秘密。直至伍樂怡想補食材時，郭子豪終於發揮功用，被要求錫評判薛家燕一啖，見到他瞬間由嘲笑mode變驚訝mode，認真搞笑，不過家燕姐卻請郭子豪食檸檬，唔畀錫，郭子豪改為抱起並親吻廚師justin，成功過關。而到第二次補食材，伍樂怡被要求與郭子豪互親胸肌，郭子豪又搞爛gag問人：「請問妳胸肌喺邊？」估唔到佢咁有喜劇細胞。
郭子豪見靚女不動心 主動親吻何廣沛勁甜蜜
另一邊廂，何廣沛亦不讓何廣沛專美，當余潔瀅忘記拿重要食材意粉，何廣沛即與她邊唱《皆大歡喜》，邊大跳十字步， 總算贏得家燕姐歡心。不過與兄弟郭子豪一樣，何廣沛同樣「食嘢唔做嘢」，不過就換來無限艷福，事源當何廣沛不慎切傷手指，一眾評判竟要求余潔瀅親吻何廣沛作補償，女方更甜絲絲望實佢，搞到何廣沛既怕醜又sweet。
正當以為今鋪發啦！點知郭子豪竟然拋下拍檔伍樂怡衝去他們的廚房，何廣沛以為他想趁機親吻余潔瀅，點知其目標竟然是自己，只見郭子豪不顧衞生，捉住何廣沛一隻黏滿魚鱗的手，當著大家面前親下去，真係笑到大家個心都離一離，仲激發網民無限聯想，希望TVB參考日劇《大叔的愛》，開套《跳躍hehe線》變畀佢哋喎。