近日《跳躍生命線》人氣角色「雄姐」張彥博因唐樓倒塌墮樓，突然橫死的結局很多觀眾表示難以接受，大家紛紛留言想雄姐返生，又讚好劇本都要有好演員配合才成事，如今張彥博正正示範如何以三十八歲之齡演活天真無邪的雄姐，成為劇中最受觀眾歡迎的人物。其實雄姐與張彥博真人很相似，劇中他在學堂自知體力弱過人，做體能訓練時特別辛苦，但他每次都硬著頭皮捱下去，甚至用額外時間鍛鍊，終於成功出班；現實中張彥博同樣很勤力，未涉足娛樂圈前做過IT部職員、茶餐廳侍應、救生員及派傳單，入行十三年甚麼角色都做過，現在爆紅正是收成時期。
窮到三餐食公仔麵食到入院 搭車都要問人借錢
張彥博經歷過一段很窮困、坎坷的日子，未入行之前在電腦公司工作，如今回想都感觸良多：「嗰時得六千蚊一個月咋，咁係啱啱出嚟做野嘅人工，嗰時已經好窮，仲要同朋友夾份每個月俾三千蚊租屋。」原來他當時把逾半人工用於租金，如果扣減水電煤、電話費，三餐都成問題：「試過銀包連一百蚊都冇，食魚蛋同燒賣當正餐，又試過一個月裡面每一日食三餐公仔麵，結果食到入咗醫院，成個人瘦到塊臉凹晒，好似中咗毒咁樣！ 我發誓從此唔再食即食麵！」
去到2005年，張彥博正式入行做歌手，與馮嘉輝、伍德耀組成男子組合赤子樂隊Akago，負責做伴唱及鼓手，以為終於可以把興趣當工作，其實有苦自己知：「搞赤子樂隊嗰三年冇出過糧，靠教樂器維生，但好唔穩定，最少錢嘅時候，都冇數字（錢）喺裡面（戶口）㗎喇，撳唔到出嚟，搭車都要問人借。」幸好有家人接濟，令他仍可滿足生活基本需要：「嗰陣屋企人有啲都會support我，阿媽好好，有時會擺少少車馬費喺屋企。其實攞完係唔開心，為咩呢？依家咁樣，搞到自己身無分文，咁大個人行到出街冇錢嗰種感覺係好自卑。」
最終樂隊只維持四年便因約滿而解散，張彥博唯有重新找工作，為餐廳舞台表演者set樂器。由歌手淪落到器材助手，張彥博坦言：「係我喺娛樂圈嘅一啲低位，自己喺嗰陣時候都有好多迷失嘅時間，覺得喺個圈裡面唔知點樣要走，曾幾何時我覺得自己寫作嘅作品冇乜人欣賞，甚至係好差，試過覺得唔開心，但最後靠信仰度過。」，難怪期間他曾與Boy'z成員張致恆一同創作和演唱基督教歌曲。經過重重阻礙，張彥博仍未放棄歌手夢，試過於2012年參加《聲動亞洲》，但於第二輪比賽被淘汰、2013年參加《2013快樂男聲》，更於第一關就被淘汰。
扮女人茄哩啡乜都做 終憑老本行彈起
2011年張彥博參與TVB節目，化名Bob上《變身男女chok chok chok》變裝扮女人，經過一輪化妝、戴假髮、著裙、穿高踭鞋之後即刻變成大美人，又故意陰聲細氣、動作優雅地扮鋼琴師Bonnie，讓當時嘉賓周汶錡與蘇志威一度以為他是真女人。最後張彥博成功加入TVB，雖然讀完藝員訓練班就馬上接劇拍，可惜一開始只是做行行企企，沒名沒姓的臨時演員，如醫生、家丁、公司職員、手下、不良少年等，毫無發揮機會。
等了幾年張彥博卒之獲得《一屋老友記》配角，飾演廢青細寶，與實力派前輩歐陽晨華做一家人有對手戲，擦出不少火花。劇中的他是個精通樂器的人，終於有機會讓他大show音樂才能，更於網上掀起熱話，見到有觀眾討論自己，張彥博食住上與劉佩玥拍片，邊彈結他邊合唱插曲《你認真嗎？》。結果短片爆紅，成功帶挈角色備受讚賞，更首度獲提名《TVB 馬來西亞星光薈萃頒獎典禮2016》「最喜愛TVB飛躍進步男藝員」、「2016年紅爆網絡新鮮人大獎」，以及《萬千星輝頒獎典禮2016》「飛躍進步男藝員」等獎項。如今張彥博憑著《跳躍生命線》的雄姐再次人氣爆燈，工作排得密麻麻，正式脫離從前辛酸日子。