支持聖誕慈善義賣 齊為患病兒童送暖

聖誕節除咗行街睇燈飾「打卡」之外，仲可以做善事，黛安就有兩個聖誕慈善義賣推介畀大家。黛安知道，屈臣氏一直都透過義賣屈臣氏慈善熊公仔幫有需要人士籌款，大家只要由即日起，去指定屈臣氏分店用慈善價$59.9買10.5吋熊公仔（深啡色或淺灰色），屈臣氏就會喺每隻售出嘅慈善熊收益中，捐$5畀香港認知障礙症協會，而易賞錢會員更加可以再用9折優惠買熊公仔㖭。

另一個就係HomeSquare聯同BoConcept舉辦嘅聖誕禮物籃義賣，大家只要由即日起至26日去HomeSquare 1樓中庭就參與到，部分收益會撥捐「願望成真基金」幫患病兒童，齊齊化身聖誕老人做善事啦！

另外，HomeSquare由即日起至下月6日仲會化身成丹麥聖誕村莊，而隔籬嘅新城市廣場又有以《愛麗絲夢遊仙境》為主題嘅聖誕裝置，分布喺商場一期3樓同埋7樓星光花園，「打卡」位有成20個咁多，買完禮物籃仲可以去大影特影㖭！