旅發局遴選旅遊大使 「老友記」齊齊推介香港文化

香港人真係好鍾意香港呢個地方。黛安日前接受旅發局姊妹梁美寶Cynthia邀請，做旅發局義工「老友記」遴選工作，今年反應踴躍，面試嘅人質素更高，臥虎藏龍，有行政總裁、老闆、社工、教師、會計師和法律系學生等，對香港旅遊景點十分熟悉。問佢哋建議旅客去邊啲非傳統景點，佢哋推薦重慶大廈、紅磡觀音廟，甚至鹽田仔等冷門地方。

要做「老友記」真係要識18般武藝，任何18歲或以上香港居民，只要性格開朗、熱愛香港及願意為訪港旅客提供服務，對文化傳統、購物飲食、建築及景點、綠色旅遊及文娛藝術有豐富認識，廣東話、英語及普通話要流利，識外語者更佳，完成培訓後於旅發局旅客諮詢中心、旅發局舉辦的大型活動工作，又可提供綫上聊天服務，向世界各地旅客介紹香港生活文化，提供道地旅遊建議。「老友記」計劃已踏入第10年，目前已有70多名老友記，佢哋真正係香港旅遊大使。