海洋公園×麥兜 推主題美食

聖誕節就快到，又係時候訂定聖誕大餐喇！黛安知道，海洋公園最近首次聯乘本地原創卡通麥兜，下月8號至出年元旦期間，將會推出超過30款限定主題美食，由造型精緻嘅西餐、日式便當，到街頭小食等應有盡有，真係睇得又食得。

其中海洋公園充滿冬日風情嘅冰極餐廳，就會推出一款「麥兜春田花花聖誕大餐」，黛安昨日已率先試食咗，呢個大餐有齊前菜、湯、二選一主菜、甜品同特飲，每位只係388蚊起，造型仲非常精緻，好似有煙三文魚薯仔沙律嘅「薯地的麥兜雪人」、青豆蓉湯伴煙火雞嘅「海洋中的阿輝」，其中一個主菜選擇威靈頓牛柳，仲專登用咗鹿車雪橇造型呈獻，再由着上聖誕裝嘅麥兜拖住行，睇見都食慾大增！

勇奪多個大獎

海洋公園一向創意多多，難怪獲獎連連！最近園方喺美國舉行嘅一個國際遊樂園及景點協會博覽會上，勇奪3項殊榮，包括憑動夏嘉年華2018勇奪「最具創意全場活動」大銅鈴獎、以哈囉喂全日祭2017重頭表演「猛鬼戲院最終回」奪「最具創意萬聖節景點、表演或體驗」大銅鈴獎等，海洋公園行政總裁李繩宗仲預告聖誕活動中，會有更多驚喜表演節目！