參觀上海興業太古滙 住海派簡約Middle House

上星期黛安應太古地產行政總裁白德利和May（林珩）邀請，去上海參觀上海興業太古滙，並入住太古旗下全新服務式住宅鏞舍（The Middle House）。因為都有好一段時間無嚟上海，加上同行又有一班傳媒行家和專欄作家，心情特別興奮。

「居舍系列」遍布喺北京（瑜舍The Opposite House）、成都（博舍The Temple House）同香港（奕居The Upper House），今年初再喺上海加入新成員。項目選址上海興業太古滙，命名做「Middle」係因為位置正是具歷史文化氣息的「大中里」，是上海最繁華地段，依家變成一個集大型購物中心、兩座辦公大樓同三間酒店嘅高尚地段。

鏞舍設計非常獨特，既有上海的歷史文化精髓，亦有現代化的設計理念，將上海經典海派作風，巧妙地融合喺極簡主義的氛圍裏面，得到高度的平衡，屬米蘭室內設計師Piero Lissoni高超演繹。

喺服務式住宅和酒店嘅地庫，係鏞舍嘅「謐尋」水療中心，可說係喺煩囂嘅鬧市之中的一片寧靜，除暖水泳池外，有24小時開放嘅健身室，最吸引黛安嘅係Hypoxi健身機，着上緊身衣，喺要瘦身嘅部位泵氣，再喺Hypoxi機裏面做運動，據稱可消去3倍脂肪，令黛安想立刻體驗。

「謐尋」水療中心 助住客遠離煩囂

而最近成為打卡熱點嘅Starbucks Reserve Roastery，就坐落喺興業太古滙前沿的圓形建築，裏面嘅烘焙工坊，係除西雅圖總店外嘅第一家；而每日生產咖啡粉，除供應自己外，仲有周邊幾百間星巴克。星巴克上海烘焙工坊總經理連恩偉話，希望將呢度變成一個生活咖啡博物館，而家每10個客人，有7個係第一次到訪。黛安覺得呢度畀大家一種好unique同fashionable嘅體驗。

太古地產行政總裁白德利（Guy Bradley）仲專程由香港飛上海同我哋一齊吃飯。佢希望興業上海太古滙，好似北京三里屯太古里、廣州太古滙同成都遠洋太古里，成為當地新地標，黛安恭喜佢話三里屯太古里開業10年，成績斐然，廣州同成都好成功，預祝佢再下一城，仲講今年聖誕會去成都，而且會入住博舍，佢好高興並提早祝我聖誕節快樂！