「我點都會幫太太起返身,唔會放棄佢!」Kenji的34歲妻子日前因腹痛求診,確診患「朱古力瘤」後注射抗生素,卻因敏感變成植物人,今日已是她與死神搏鬥的第9日,連日來丈夫Kenji不斷向行內名醫叩門,希望他們願意伸出援手救救愛妻,其中腦神經外科名醫方道生表示已接獲家屬的請求,正了解病人情況。
Maggie的丈夫Kenji接受晴報訪問時表示,希望香港的醫學專家、名醫可以伸出援手,為了拯救愛妻,他在妻子出事後即放下手上工作,一方面每日在醫院陪伴身旁為她打氣,另一方面自己行上網尋找相關資料,甚至向相關醫學專家及名醫叩門,希望他們能伸出援手,到醫院見見其妻,「奇蹟總會出見,我唔會放棄每個可能性。」
其中他曾聯絡香港著名腦神經外科醫生、香港中風基金主席方道生,方醫生向本報表示,自己本人未曾與病人家屬接觸,但診所已接獲家屬的求助,會先透過姑娘了解病人情況再作決定,不排除任何可能性。
為病人打氣有幫助
方醫生指出,任何藥物都有機會引致藥物敏感,重則會令血壓飆升,甚至導致喉嚨腫脹堵塞氣道而窒息,「會好似游水浸親咁樣,突然抖唔到氣。」嚴重者亦會令心跳停頓。他指腦部因長時間缺氧受損,令人失去意識但仍然存活,即俗稱的變成「植物人」,在此階段醫生需從各方面觀察及評估病人情況,「依段時間可以好漫長,可以係以星期計,可以係以月、甚至年計。」這需視乎不同個案而定。
突如奇來打擊令家屬崩潰,方醫生表示理解家屬的心情,希望家屬要堅強,繼續為病人打氣絕對有幫忙,「雖然我哋睇到病人好似無反應,但可能其實佢見到光影、聽到聲音,只係表達唔到,所以家屬多啲同病人傾計、多啲陪伴佢,對病情絕對有幫助。」
Maggie昏迷時序表
10月30日 Maggie因腹痛入院,診斷患朱古力瘤,獲處方抗生素,安違於3日後做手術。
10月31日 Maggie用藥後出現耳鳴
11月1日 07:55 Maggie轉用新藥抗生素數分鐘後按急救鐘,不久陷於昏迷及心臟停頓
11月1日 10:00 經2小時搶救Maggie恢復心跳
11月1日 10:30 轉往加護病房,須靠呼吸機及強心針吊命,晚上接受洗血
11月2日14:30 轉往瑪嘉烈醫院深切治療部,至今仍未甦醒