曾幾何時，日風可以話橫掃香港，令不少日劇成為大家心目中的經典，更成功捧紅不少藝人，當中由深田恭子與金城武主演，於1998年播出的《神！請給我多一點時間！》，至今依然被人封為神劇，事關不單止男神金城武搶鏡，年僅16歲的深田恭子亦令人眼前一亮，年紀輕輕的她飾演愛滋病患者，堪稱考牌之作。
論外型與演技，深田恭子走紅可說是理所當然，但可惜因為其易肥體質，為她帶來不少是非，更曾發生穿著緊身戲服時，逼爆鈕的慘劇，被冠以「肥恭」污名，雖然其後深田恭子曾經努力減肥，但身材始終時肥時瘦。幸而踏入2018年，深田恭子以火辣身材強勢回歸，更於夏天遠赴夏威夷拍攝性感寫真，V煞面、黃蜂腰，再加強勁事業線，以行動證明寶刀未老，宅男粉絲返晒嚟！不過短短半年間，剛剛踏入36歲的深田恭子又再打回原形，近日她於日本出席活動，對比拍寫真個陣身形最少脹幾個碼，而且唔止包包面重現，更帶點膠味，令不少網民喊驚：「36歲仲好後生，點解好似變咗第二個人，有啲似徐子珊？」「可能呢啲叫早熟早殘，不過佢個樣真係幾膠吓。」不過亦有網民力撐偶像，「白色衫咪影得佢肥，況且佢出名肥底，係咁上下啦」