肥媽主持的TVB節目《肥媽優質食好D》尋晚播出第一集，今次肥媽一改以往食平D路線，教大家食好嘢，當中包括英國皇室御用斧頭扒，肥媽同6號陸浩明仲食得鬼咁滋味，而TVB亦好貼心一播完節目，就即刻去big big shop網購平台廣告，等大家可以網購學肥媽一齊鋸靚扒。
不過肥媽的一條龍式服務，就似乎惹來同樣出名煮得的杜汶澤不滿，尋晚阿澤喺自己嘅網上烹飪節目《為何深夜總是餓》炮製肉絲炒麵，但因為用電磁爐火力不足，導致個麵黐晒底，而勇於認錯的阿澤不僅於facebook道歉，更突然發火炮轟肥媽：「從來不解釋失敗的原因，因為失敗就是失敗，我一力承擔……因為我不想淪為連焗嚿斧頭扒焗完都唔敢切開比觀眾睇嘅師奶教煮餸呃錢電視節目主持人！」雖然佢無開名，但既係電視節目主持人，又咁啱係整斧頭扒，咁即係話緊肥媽啦！而睇返《肥媽優質食好D》尋晚個集， 肥媽焗完斧頭扒後，的確未有一氣呵成即時切開，而係隔咗一陣先切開畀大家睇，難怪有網民亦認同阿澤：「隔咗咁耐先切開，都唔知係咪原先個嚿啦！可以掉包造假。」不過亦有網民力撐肥媽：「除非一鏡過，否則即時切開都可以係第二嚿，我信肥媽廚藝唔會差成咁！」
其實肥媽同阿澤一樣出名惹火，之前佢拍嘅《大灣區活好D》因為教人食鯇魚魚生，搞到食安中心都要出聲話鯇魚魚生易有寄生蟲，不過肥媽仍然堅稱無問題，結果於網上爆發罵戰，唔知今次佢同阿澤嘅風波又點收科呢？