出名煮得的肥媽，近年憑飲食節目成功入屋，賺咗唔少真銀，不過最近佢主持嘅TVB節目《大灣區 活好D》卻惹盡負評，網民唔止大鬧節目太hard sell，最大鑊係肥媽竟然教人食鯇魚魚生，嚇到食安中心同衛生署都要急急出po叫人唔好亂試，今次真係食出禍咯！
罪行一：亂教人吃淡水魚魚生 食安中心指易有肝吸蟲
話說肥媽帶同兩位女主持黃美棋、林伊麗到佛山食河鮮，介紹當地食店的招牌鯇魚魚生，眾人唔止大飽口福，仲不斷狂讚好好味，節目出街後惹來唔少迴響。食安中心同衛生署急急於facebook呼籲市民切勿進食生或未徹底煮熟的淡水魚，因為在一般環境下飼養的淡水魚，（例如鯇魚及大頭魚）可能有中華肝吸蟲，會造成膽管梗阻、肝硬化和引致膽管癌，酒、醋、日式芥辣、黃芥辣及香料均不能殺死寄生蟲。不過對於政府部門的指責，肥媽就話睇住佢哋養，自己有信心食，而美棋bb仲勁，竟然話食完「精神爽利」，點解咁似《食神》裡面sell瀨尿牛丸嘅對白嘅？
罪行二：硬銷大灣區樓盤
潮流興講大灣區，所以肥媽於節目中就去到惠州、江門、中山、佛山、肇慶及深圳多地介紹樓盤，雖然佢哋介紹嘅盤對比香港真係平好多，幾十萬都有交易，但就避談樓盤離高鐵站嘅距離，有網民質疑隨時搭去高鐵站已經要幾個鐘車程，分分鐘變咗去深山隱居。
罪行三：肥媽寸咀惹禍
本來用靚女做主持實屬無可厚非，但有唔少網民質疑明明係飲食節目，但點解主持之一的林泳淘竟然成日著緊身衫搏出位，本來只屬茶杯裡的風波，但點知肥媽霸氣回應：「有就怕咩逼？都話佢飲得奶多，有身材點解唔比人睇啫？係咪呀？咁樣嘅年紀唔比，幾時比？又唔係冇着衫，比少少睇好啦，逼爆比佢哋（男網民）諗！」言論一出，即時換來大批網民口誅筆伐，更有人質疑肥媽係咪估到收視唔得，所以要靠女藝人性感救收視？