成日聽人講內地網民好犀利，但到底有幾勁？原來係可以影響一套電視劇嘅成敗！好似號稱億萬製作、單是女主角楊穎Angelababy片酬就被指高達8千萬的內地劇《創業時代》，多得Baby的「號召力」，套劇未出街已遭網民群起炮轟，矛頭直指Baby演技差，而套劇播出後，網民當然繼續咬住唔放，直斥Baby做戲唔止浮誇、死背對白，仲做乜都只識碌大對眼，唔知佢到底做緊乜！由於呢班網民實在太有心，日夜於各大討論區洗版式攻擊，令該劇收視低開，製作單位分分鐘蝕入肉。
眼見負面攻擊層出不窮，Baby不單沒有反擊，以免再生是非影響《創業時代》收視，更於微博認低威兼認錯：「所有批評都虛心接受，感謝大家。劇情越來越好看了。」被人鬧仲要講多謝，Baby認真夠晒豁達，可惜雖然已經做到咁，但網民依然唔領情：「Baby的演技怎樣才可進步？就是退出不再演戲就可以了。」，「求求妳大家都不想批評妳，妳可否退出放過我們？」Baby認低威都繼續鬧，難怪香港唔少藝人都唔敢得罪內地網民啦，真係好大鑊架！