成日聽人講妻憑夫貴，楊穎Angelababy 自從戀上黃曉明後，從嫩模搖身一變成為一線花旦，去年她拍攝內地劇《孤芳不自賞》時，就有指其片酬高達八千萬人民幣，真係信不信由你！但其實收入與演技都唔係一定成正比嘅，近年外界對於baby演技的批評可謂層出不窮，來到近日播出的新作《創業時代》，依舊難逃攻擊，劇中飾演投資公司執行總經理的她，被質疑化妝化得太厚，加上步姿欠缺霸氣，完全唔似女強人，又指佢無論講公事抑或私事都係同一語調，質疑佢只係背對白，不過亦有網民指baby演技已經有進步，佢始終非演藝專科出身，應該給一點耐心和寬容，最重要係今次佢能夠以原聲演出，唔使再配音，證明baby一直有努力。
黃曉明無辜中箭
正當撐baby派與反baby派於微博互相攻擊之際，有人將黃曉明都拖埋落水，事關佢最近都有套新劇《你遲到的許多年》播出，有網民就話《創業時代》同《你遲到的許多年》都只係想睇其他主角，又笑佢哋做戲一味只識碌大對眼，希望佢哋返屋企湊仔喎！本來呢篇負評唔算太特別，但奇在《創》劇男配角周一圍的工作室竟然點讚，呢個讚一出，反baby派即大造文章，取笑baby嘅演技爛到連自己友都頂佢唔順，而撐baby派則將矛頭指向周一圍，炮轟他連baby基本的尊重都沒有。
隨著風波愈鬧愈大，飽受攻擊的周一圍透過工作室發道歉信，指帳戶是由三名工作人員處理，現正調查是誰點讚，並將嚴肅處理事件，又強調周一圍及其團隊絕不認同今次點讚行為，更大讚楊穎老師的敬業態度，對於今次事件令楊穎老師與黃曉明老師造成的傷害，送上誠摯歉意。不過道歉信並未能平息風波，有人質疑周一圍是因為受到劇組壓力，才被逼公開道歉喎！更有人感嘆：「這是什麼年代？說實話都要道歉?」