一向形象搞笑嘅38歲藝人林盛斌（Bob），同老婆有4個小朋友，仲有2個家傭，要由他獨力撐起頭象，經常日做夜做無時停，啲job一單接一單，可惜鐵人都智捱壞，最近健康終於出咗問題。
琴晚佢上載咗一張醫院瞓床嘅相，留言指：「一直都同自己講：『心口少少痛啫，抖返順條氣，冇事嘅。』 點知…原來係可以好大鑊。揸波仔我就話熟手啫，通波仔就真係第一次。老實講，係有d驚嘅！」
消息咁突然嚇壞唔少粉絲，紛紛留言叫佢好好保重身體，至於好友胡菩蔚亦留言打氣：「冇樹（事），入廠小執一下，之後更加龍精虎猛！」黃翠如亦留言：「一定冇事！」
今日阿Bob就傳嚟好消息，原來已經完成咗部分手術，佢回覆傳媒時透露：「有心有心，手術成功，三條血管塞晒，通咗兩條，仲有一條過兩個月先再做，呢幾日要好好休息！你哋都要注意身體健康，定期 body check ！」
近年心臟病（與心臟有關疾病，包括心臟衰竭及冠心病等）有年輕化趨勢，除咗遺傳因素，冠心病患者、作息不定時人士都有機會出現心臟衰竭，要預防先要從作息時間及飲食習慣下手。至於「通波仔」其實係冠心病發嘅緊急手術，一般以植入支架擴張阻塞血管。
預防心臟病6大方法
1. 不要吸煙
2. 保持均衡飲食， 減少進食高膽固醇和高脂肪
（尤其是飽和脂肪及反式脂肪）食物
3. 常做體能活動、保持適當體重腰圍
4. 管理壓力
5. 避免飲酒
6. 若患有高血壓或糖尿病等潛在病症，則應接受適當治療