維港投資入股科技平台 提升電競互動體驗

上網煲劇搵資料，可以話係現代人每日唔少得嘅活動。但係齋睇「零互動」嘅習慣，好快就會成為歷史，黛安聽講長和系資深顧問李嘉誠旗下嘅「維港投資」，昨日啱啱向互動式串流引擎開發商Genvid Technologies, Inc.進行融資，金額高達1,000萬美元！

呢個平台厲害之處，在於可以利用旗下嘅軟件開發工具（SDK），幫觀眾即時切換鏡頭，無論睇電競比賽定係睇波，只要點選心儀嘅角色或球員，即時可睇到額外資訊；喺遊戲過程仲可以令鏡頭實時跟住點選角色行，聽落都好有趣。

Genvid話，計劃喺未來兩年提速3倍成長，今次融資除用喺技術發展、增加人手外，仲會用嚟探索電競、手機、街機到VR遊戲合作嘅可行性。

而維港投資代表Jonathan Tam就話，未來都會加入Genvid做董事，佢好有信心Genvid兩大核心技術，即係「多動態互動功能」同「實時影像交互映射到視頻」，可以令全球20億電競玩家耳目一新！