天文台夥香港機場 展出天文景象靚相

自然天文景象可遇不可求，黛安知道香港天文台早前公開向市民徵集從海、陸、空拍攝到嘅靚相同影片，依家可以喺香港國際機場欣賞到啦！公關姊妹話，天文台收到超過2,000張照片同超過100段影片，再從中挑選63幅同20段獲獎同入圍作品喺機場展出，張張都驚為天人，真係高手在民間！

就好似由極光拍攝愛好者羅文山拍攝嘅極光相片，係喺北冰洋上空拍攝。當時佢一早就計劃咗喺飛機航程拍攝，於是喺登機前搵定飛行路綫同氣象預測，做好準備功夫。唔好以為好容易，佢話因為機艙唔可以用三腳架，惟有用手揸機，要keep住好定，之後將ISO同曝光設到更高。

仲有前香港天文台高級科學主任譚焯明博士，佢喺英國曼徹斯特上空捕捉到「彩光環」。佢話太陽朝早由東方升起，因為航班向北飛行，所以要一早預訂飛機左面向西嘅靚位，當時英國西北部咁啱密雲，又適逢大清早，太陽剛好將飛機嘅影子投射喺雲頂上，產生咗「彩光環圍繞飛機影子」。佢話可能係「職業病」，所以特別留意天氣現象，再加上天時地利人和，靚相就到手啦！

除咗天上影，業餘攝影愛好者張崇樂喺元朗大生圍就「野生捕獲」閃電，佢話當天本來係想影日落，點知突然遇到有積雨雲同閃電，臨時決定改影閃電，但佢話無論影咩題材都好，都要注意人身安全！

「風雲際會」攝影展詳情

日期︰即日起至11月11號

地點︰香港國際機場