棋盤遊戲悟人生 積極態度對逆境

所謂「世事如棋」，捉棋都可悟出人生道理。棋盤遊戲公司「遊戲人生」同「生命熱線」喺本月初舉辦咗「太平人壽盃第二屆全港校際棋盤遊戲大賽」，比賽分為中學組同小學組，兩組同學分別喺四個棋盤遊戲中一決高下。

「遊戲人生」創辦人龔蕾同黛安講，近年本港出現多宗青少年自殺事故，佢認為棋盤遊戲有獨特教育功能，可透過遊戲，激勵青少年喺縱橫交錯嘅棋盤上睇到人生大格局，唔好被眼前小挫折擊敗。

前香港立法會主席曾鈺成係主禮嘉賓之一，佢話棋盤遊戲同手機遊戲同樣令人着迷，但最大分別係人與人之間嘅互動，佢亦唔同意老師會畀電腦取代，因為互動同身教係學生成長重要嘅一環，機器取代唔到。

「生命熱線」執行總監吳志崑都同黛安講，棋盤可攻可守，人生路上亦可進可退，棋盤遊戲同「生命熱線」嘅生命教育方向不謀而合，佢話棋藝唔單只鼓勵學生以積極態度面對逆境，過程中仲可認識自己強弱之處，發掘自我價值。捉棋咁有意義，黛安都同姊妹約番個棋局先！