揚威香港 曹星如撑場 師弟潘啟情勇奪亞洲金腰帶

黛安前日（14日）應太興飲食集團董事兼總經理陳淑芳（JoJo）邀請，去灣仔修頓室內場館欣賞「Road To Glory 2」職業拳賽。多名拳手喺擂台上為榮譽而戰，氣氛非常緊張，當晚壓軸賽事好精采，係由「神奇小子」曹星如（Rex）嘅師弟潘啟情（Raymond），同日本拳手成塚亮激戰10個回合。Raymond最終喺主場歡呼支持聲中，以點數擊敗對手，第一次贏得「WBC ABCO輕蠅量級洲際冠軍腰帶」及「ABF輕蠅量級亞洲冠軍腰帶」。

聽公關姊妹講，22歲嘅Raymond賽前戰績係5勝1負，6場賽事都展現驚人韌力，其中3場仲技術性擊倒（K.O.）對手。原來Raymond曾經同Rex一齊去菲律賓受訓，Rex當晚亦有現身為師弟打氣；難怪Raymond喺擂台上表現出色，不負眾望，贏得金腰帶。

賽後聽Raymond講，賽事途中雖然打到暈暈哋，但能夠喺香港主場獲得金腰帶，感覺難能可貴，下個目標就要贏世青賽冠軍，相信自己可以做到。比賽後太累，佢先瞓足，昨天心情依然好興奮，Raymond話會先同朋友食餐好慶祝下，短暫休息2個星期後，就會開始復操鍛練體力，務求喺世青賽有好表現。

前晚賽事除咗Raymond呢場壓軸戰，同場仲有2場女子拳賽，其中一場係香港嘅黃嘉欣對戰日本鈴木菜奈子，嘉欣最後雖然落敗，但賽事同樣十分精采，黛安同觀眾都睇到好肉緊。

賽事推廣人、DEF Boxing總教練兼執行董事劉志遠跟黛安講，香港嘅職業拳擊賽只係啱啱起步，香港需要提升軟硬件，同埋搵更多嘅職業拳擊手配合，職業拳擊賽先可不斷向前。黛安希望愈來愈多人支持拳擊運動，令香港拳擊運動員有更好的發展。