海洋公園暑假優惠 學生68折玩轉動夏嘉年華

就快放暑假，想同一班friend留低難忘回憶，去主題公園玩自然係最易攞滿分行程！一向新意思多多嘅海洋公園好姊妹報料畀黛安，今個暑假公園會舉行史上最大型嘅「動夏嘉年華」，每個鐘都有新奇節目觀賞，保證持續有驚奇；香港全日制學生仲可以低至六八折買門票入場，真係夠晒抵玩！

雖然黛安無得放暑假，但一攞到海洋公園嘅節目表，都好想請假入場玩番幾日啊！平時黛安都好鍾意喺園內同各種海洋生物、野生動物同雀島互動嘅感覺，今次園方就特登用咗佢哋嘅形象嚟做主角，參與加勒比夏日巡遊同埋夏夜巡遊，唔使出國就可以感受到異國風情，晚上表演仲會有夜光效果，啱晒用來打卡影靚相。

姊妹仲話，今年仲搵嚟健力士紀錄保持者進行超高度嘅火熱奇技大滙演，加拿大國家級韻律泳隊仲首度來港，獻上優雅又透心涼嘅「韻律水精靈」表演。園方都安排咗唔少演藝人員做快閃表演，好似巴西戰舞陣、熱夏FEVER啦啦隊都會喺遊客身邊pop up現身，夠晒開心暢快。

而由今日（13日）起至9月2日，全港全日制學生都可以用480蚊，買到原價720蚊嘅「夏日玩樂美食」套票，除咗門票，仲包埋美食套餐連Häagen-Dazs雪糕，同埋攤位遊戲「買20蚊送20蚊」嘅優惠券4張，啱晒學生哥預算。