鼠戰中環8月舉行 賽道障礙升級大挑戰

每年一度嘅「鼠戰中環」又嚟喇！今年會喺8月26號，於中環遮打道舉行。今年嘅賽事共有8個賽段，多個受歡迎嘅障礙項目將會升級；其中「步步為營」，參賽健兒要穿越難度更高嘅繩索木橋，測試隊員喺壓力中保持鎮定嘅能力；而喺「極速致勝」就要「開住」芝士車，跨過多個巨型芝士障礙物，黛安相信屆時一定好緊張刺激。

比賽今日起以先到先得形式報名，只要搵齊8個人組隊，最少籌到6萬蚊就可參加；參賽隊伍只得60隊，報名要快喇。5至10歲嘅小朋友可以參加「未來鼠王戰」，每人最少籌2千蚊就可報名。

另外，大會由今日起至24號，喺中環交易廣場中央大廳設「鼠戰」主題展覽，市民可用擴增實境（AR）同虛擬實境（VR）體驗鼠戰賽段嘅障礙物，7月仲有STEM教育工作坊可以參加，親手炮製屬於自己嘅電動芝士車呀！