海洋公園送萬張學生門票 接受學校申請

今年預算案提出向海洋公園撥款，送出1萬張門票畀中小學生，通過遊戲學習。園方噚日公布申請方法，邀請5,000名中學生同5,000名小學生參加，每間學校最多可以安排200人入園，成功申請最快7月底收到通知啦！

海洋公園主席孔令成話，「連繫學生與大自然－STEAM學習計劃」已將邀請函寄畀全港中小學，提醒有意申請嘅學校，要用邀請函入面嘅學校登入資料，遞交申請表，仲要喺表格上闡述過往推動校內學生學習有關環保自然教育同STEAM嘅知識，同埋有效運用海洋公園資源配合環保自然教育同STEAM嘅課程大綱，即日起至6月25號接受申請，成功申請嘅學校會安排喺9月起參觀。

至於「STEAM職業同輩互導大使計劃」，喺評審過程中得分最高嘅十幾間中學，可提名6位學生參與6個半日嘅工作坊，好似動物護理及保育工作坊，向同學講解照顧唔同動物所需要嘅科學同科技元素。完成後就可以成為學生大使，明年參加唔同活動，分享佢哋嘅所見所學。