「有種藝術」長幼共融 打破年齡隔膜

好多人都怕老，但黛安就覺得只要有心，銀髮族同後生仔一樣可以活得精采！香港青年藝術協會今年2至5月舉行咗「香港賽馬會社區資助計劃︰『有種藝術』社區藝術計劃」，計劃內容主要係由後生仔同長者一齊合作12個同類型嘅藝術項目，其中包括形象設計及攝影「銀齡光華」同埋布偶劇「相請不如［偶］遇」等，拉近長幼距離，一齊樂觀積極面對人生。

有份參加「銀齡光華」嘅銀髮長輩陳子賢（Patrick）不但有機會走入攝影棚試做模特兒，79歲嘅佢仲係模特兒當中年紀最大嘅。有參加嘅學生話，原本對長者印象係比較固執，但發現原來佢哋好樂觀，仲可以打成一片。

公關姊妹同黛安講，今次計劃嘅藝術作品仲會喺兩個場地展出，分別係由即日起至6月4日會喺希慎廣場展出其中九組作品；而聽日（24日）起至6月20日就會喺中環H6 CONET展出當中七組作品，兩個展期嘅周末都會有免費導賞團同工作坊。