新春節目 ifc投虛擬金幣許願 德福睇老夫子展

一年容易又新春！最近去各大商場shopping，四圍都布置得好有新年氣氛，啱曬一家大去打卡，又入下年貨。好似ifc商場就喺中庭設計咗一個仿真度超高嘅錦鯉許願池，將108條寓意吉祥嘅錦鯉帶到商場！公關姐妹向黛安介紹，今年ifc結合咗數碼科技，只要用池邊嘅互動裝置，或用手機掃描QR code登入活動App，喺許願池拋下虛擬金幣，金幣會幻身做祝願錦鯉，並送上新春語句！另外即日起至25/2，用電子貨幣消費滿$3,800就有禮劵送，仲可以參加大抽獎，有機會贏取50萬「亞洲萬里通」里數㗎！

圓方掛如意繩結

另外，ELEMENTS圓方今年聯乘本地設計師Zoe Siu，創作咗中西合璧嘅如意繩結藝術裝置「願望果」，用咗5個古今中外嘅繩結掛喺果實上，代表財富、家庭、愛情、健康同事業，為大家送上祝福。

想辦年貨嘅話，黛安就推薦德福廣場嘅「港式懷舊賀歲市集」，商場喺1期中庭展覽區特別打造出一條香港懷舊老街，入面有好多本土經典品牌，好似利苑、東方紅、美樂士多等，仲有恆香老餅家、元朗大同老餅家等老字號，而商場2期仲會有老夫子55周年手稿作品展，唔好錯過呀！