熊本直航下月重開 飛九州歎90cm啖啖肉巨雞

鍾意去日本嘅讀者注意！下月19日起，縱橫遊將會同香港快運合作，推出獨家直航熊本旅遊團！今次係自去年4月熊本大地震後，首次有香港至熊本嘅直綫航班復航。縱橫遊將會包機，再預留部分機位公開發售，大家又可以趁住假期去玩啦！

昨日熊本縣香港代表事務所所長板東良明同黛安分享，熊本縣有好多歷史景觀，亦有唔少美食，當中最特別嘅熊本名物要數「天草大王」！聽板東良明介紹，「天草大王」係一種高達90厘米嘅巨雞，一咬落去就有肉汁流出，聽落已覺得好吸引。

除咗熊本團之外，縱橫遊亦會再推索價$118,888嘅「極致奢華6天日本團」，由旅遊達人杜如風帶領住16位團位暢遊東京、箱根！想跟住佢捐窿捐罅血拼、食好嘢，就記住報名啦。