由醫護到政壇 陳肇始不斷「踩過界」

今屆特首林鄭月娥係本港首位女特首，佢內閣唯一女局長、食物及衞生局揸fit人陳肇始亦備受關注。黛安一直都好仰慕呢啲咁出色嘅女性，最近馬會公關姊妹透露，今日出版嘅馬會刊物《駿步人生》有陳肇始嘅專訪，黛安都好期待，並預先向姊妹打聽咗訪問內容，了解呢位由護理界、學術界再「踩入」政界嘅局長的故事。

原來局長生於醫護世家，媽媽係醫生，兒時喺屋企接觸唔少聽筒之類嘅醫療器具，可謂從小培養興趣；中學畢業後就到到英國攻讀兒科護理課程。返港之後，佢加入醫護界，仲學而不倦，三度進修，之後獲邀加入政府，到今屆更統領食物及衞生局，將自己視為健康推動工作者。

護士出身 三度進修

作為護士出身嘅局長，外界有人擔心佢無做過醫生，難以駕馭醫生團體，陳肇始就唔認同，佢話無論邊個專業出身，甚至係非專業，最重要係有視野，可以同其他專業合作。

局長喺訪問入面仲透露佢有多個女性榜樣，包括代表護士精神嘅南丁格爾、世衞前總幹事陳馮富珍、港大醫學院內科學系榮休教授楊紫芝。政界方面，佢對特首林鄭月娥、國務院副總理劉延東、以及前副總理吳儀都非常欣賞。喺英國讀書多年嘅佢，又大讚英國皇室女性嘅風範同談吐舉止優雅，顯出良好教養。