踩單車送石油氣 黃金寶顯吃力

大家都知黃金寶係前世界單車冠軍，但原來香港仲有隱世單車高手，佢架車連阿寶踩落都覺得吃力！最近黛安喺旅發局fb睇到新鴻基地產香港單車節嘅宣傳片，佢哋邀請咗阿寶同埋民間高手、踩車送石油氣送咗30年嘅雄哥，一齊拍呢條片，睇完真係連黛安都非常佩服兩位呀！

65歲依然中氣十足嘅雄哥，每日都會踩住佢架戰車喺深水埗穿梭送石油氣，原來佢架車已經用咗超過50年，成72公斤重，最多可以載成7桶石油氣，加埋成300公斤重！阿寶就膽粗粗試踩下呢架重量級單車，連佢都顯得有啲吃力，話香港車壇臥虎藏龍！阿寶仲邀請雄哥一齊參加下個月8號嘅單車節𠻹，佢話好多車手都想喺青馬大橋、中環呢啲標誌性地方踩車，希望香港有多啲呢類城市繞圈賽咁話。