太古糖廠街變農墟 買鮮蔬跟名廚學煮餸

今個夏天真係特別熱，所以清新又有益嘅有機蔬果，就最啱呢個時候食啦！黛安昨日經過鰂魚涌太古坊，見到糖廠街市集推出咗個限定農夫檔，即場售賣多款時令有機食材，聽講仲有3位名廚之後親自售賣自家製嘅健康、實惠美食；而活動期間所售有機午餐嘅收益，仲會捐畀惜食堂�𠻹，真係值得支持喎。

據黛安所見，今次限定嘅農夫檔，除有售南瓜、番薯及火龍果等當造蔬果，仲有近期大熱既秋葵同消暑佳品西瓜。問番公關老友，佢話農夫檔推出以來，每日中午12點至2點同下午5點至6點最墟冚除咗上班族光顧，仲有附近唔少識飲識食的街坊，都有專登來幫襯。以佢所見，就以秋葵同西瓜最好賣，「秋葵好新鮮，洗乾淨就可以食，唔使煮，所以唔少上班族買咗返公司會即食；至於西瓜就唔使講，既消暑又清甜解喝，仲有迷你菠蘿仔都好受歡迎。」

除咗售賣各款時令有機食材，公關老友話，佢哋8月中起仲邀請咗黃凱欣（Doris Wong）、梁雅琳（Hilda Leung）及蔡家富（Gabriel Choy）等名廚，將一連3個星期二喺農夫檔親自主理簡單新鮮，且經濟實惠嘅美食。昨日Gabriel亦有到場，率先示範以無花果、藜麥及意大利水牛芝士炮製健康沙律，大家都食到豎起手指公大讚好味。之後佢同幾位名廚仲會教大家製紅火龍果檸檬特飲、泰式紅咖喱燴素鴨、黑醋野菌藜麥米紙卷等，記住唔好錯過呀！