書展遇打風 會展2小時調千人應急

一年一度嘅書展昨日閉幕，相信唔少《晴報》粉絲過去幾日都有去書展，不過星期日（23日）遇上急急來襲嘅熱帶風暴「洛克」，天文台隨即掛上8號風球，令書展暫停咗半日，打亂好多市民周日逛書展嘅計劃。幸好個風來得快亦去得快，黛安聽講當日下晝書展重開，背後全賴一班默默無名嘅功臣，就係會展管理公司超過1,000名全職同臨時員工喇！

會展管理公司董事總經理Monica（梅李玉霞）同黛安講，喺天文台宣布除下8號風球後，短短兩個鐘就啟動應急團隊，調動人手，確保喺市民排隊入場、清潔、餐飲等方面都做好準備。

原來管理公司好細心，為咗唔想市民喺室外飽受風雨吹打之苦，額外安排會展中心會議廳前廳作排隊之用；而除咗會展中心內7間餐廳，會展中心5樓又特別提供1,324個座位做臨時大型美食區，等大家食得開心又舒服！服務咁貼心，真係要畀個讚呢班幕後功臣呢！