荔枝角街頭嘉年華 打卡歎懷舊美食

黛安啲朋友都不時遊港發掘新蒲點打卡，佢哋同黛安報料，西九龍本周六（7月1日）有個「1日限定」嘅嘉年華面世，到時荔枝角長義街除了有得食、有得玩，仲有歌聽，仲係西九首次辦戶外嘉年華𠻹！

今次嘉年華會以「香港掂檔」為主題，九巴、天星小輪、海洋公園同荔園等，都會在場擺攤位同大家玩遊戲兼送禮物，兼賣埋本地小食等。

D2 Place都會配合嘉年華，喺7至8月開設大型室內遊樂坊，場內有唔少本地潮語嘅霓虹招牌任你影；同場仲有10個本地小食檔組成的「24度風味」食街，可食盡龍鬚糖、雞蛋仔、咖喱魚蛋等美食。食飽想運動下，仲可以上「辦公室擂台」玩下擲粉刷；九巴會首度在商場的「九巴辦館」展出1比1舊站牌、車票等文物同照片，並首賣俗稱「白板車」的丹尼士短龍10米等巴士模型。