鼻鼾的真相：年紀、酒精與健康的關聯

新年團拜，老友阿秀不忘挖苦老公，投訴他打鼻鼾多年，沒想到最近老公竟然反過來投訴她打鼻鼾，影響他睡眠！

秀：「容忍佢啲鼻鼾幾十年啦，而家竟然話我有鼻鼾？如果佢唔用手機拍低，我都唔信！仲成日拍醒我，叫我收聲，搞到我冇覺好訓！」

我：「我最近都有打鼻鼾，因為過敏性鼻炎，鼻黏膜腫脹，氣流通過時產生噪音。」

秀：「但我冇鼻炎，點解都會打鼻鼾？」

我：「因為你老囉！」

秀：「天呀！啱啱過完年，咁快有人提醒我係老餅？」

我：「年齡增長會令喉嚨肌肉鬆弛，打鼻鼾機率自然提高。」

秀（崩潰）：「面部鬆弛、胸部下垂、屁股下垂、手臂變蝴蝶袖，條頸又變火雞頸，冇想過連喉嚨都會鬆弛？」

我：「當然啦！年紀大，喉嚨同軟顎（上顎後方的柔軟部分）啲肌肉都會變鬆，瞓覺時容易塌陷，影響氣流通過，就會產生鼻鼾。再加上舌頭肌肉控制能力減弱，訓覺時舌頭向後滑，部分阻塞呼吸道，搞到呼吸困難。有啲人年紀大，喉部組織變厚，鼻腔結構改變，氣道變窄，打鼻鼾只會愈來愈嚴重。」

秀：「原來打鼻鼾都係衰老現象！但係，啲年輕人又點解會打鼻鼾？」

我：「肥胖都係原因之一，頸部脂肪積聚會壓住氣道，加劇鼻鼾。」

秀（翻白眼）：「但有啲後生仔又唔肥，身形fit到爆都照打鼻鼾喎！」

秀老公（忽然插嘴）：「你講緊我？」

秀（瞪大眼）：「吓？！」

我哈哈笑：「正想講你！嗜酒嘅人都有鼻鼾問題，飲得越多，鼻鼾越誇張，因為酒精令喉嚨肌肉過度放鬆，仲會令鼻腔血管擴張、充血腫脹，進一步狹窄氣道，令鼻鼾加劇。」

秀老公：「飲酒都影響咩？」

我：「當然啦！酒精係中樞神經抑制劑，會令全身肌肉（包括喉嚨、舌頭、軟顎）完全放鬆，呼吸道收窄，空氣通過時產生震動，就變成鼻鼾。而且酒精影響大腦對呼吸的控制，令呼吸不規律，打鼾更嚴重。」

秀（嘆氣）：「如果我老公個荷包都鬆弛就好喇！」

秀老公：「你話咩呀？」

（本欄隔星期二、逢星期五刊登）