星巴克風味飲品全新自訂甜度 想幾甜就幾甜

今時今日大家都追求健康飲食，公關姊妹同黛安報料，最近香港星巴克為呍呢嗱、榛子、焦糖及海鹽焦糖特色風味飲品，推出全新甜度自訂選項，新推出嘅風味糖漿配有甘蔗糖漿及風味基底，大家可以自由調整甜度，又可保留飲品嘅風味，顧客更可選擇3種唔同甜度，包括無甜、少甜及正常，想要幾甜都得，自主性更大。星巴克亦會推出少甜星冰樂®，雖然甜度較低，但仍保留經典星冰樂®綿密細滑嘅口感，最適合鍾意甜食但又怕肥嘅女仔。

另外，仲有一系列精緻悅目嘅夢幻甜點已經登場，以柔和色調及療癒甜香呈現日本櫻花盛開嘅春日氣息，當中包括草莓抹茶雪芳蛋糕、草莓乳酪脆脆蛋糕、春日草莓撻等等。

此外，香港星巴克更與韓國星巴克聯手創作，推出多款粉色系單品，包括不鏽鋼隨行杯、水樽、咖啡杯及多款生活精品。系列沿用淡粉色、純白色及夢幻紫等淡雅配色，造型小巧精美，部分商品仲印有旋轉木馬及噴泉，以及浪漫花海中兔仔蹦蹦跳跳嘅可愛模樣，令人愛不釋手。