JR《GIANTS︰Rising Up》@海港城 亞洲首個「GIANTS」系列攝影裝置藝術

黛安放假時都會去睇下展覽，扮下偽文青。最近聽公關姊妹講，香港藝術月期間，海港城亦會邀請法國著名藝術家JR將佢嘅「戶外藝術畫廊」帶嚟香港，喺3月中展出亞洲首件GIANTS系列裝置藝術。GIANTS系列嘅作品就好似佢個名咁，以巨型見稱，將佢拍攝嘅黑白人像攝影相片轉化為藝術裝置。今次展出嘅作品《GIANTS︰Rising Up》會坐落喺海運觀點，環抱270度維港景色，JR今次更會將香港獨特嘅建築工藝「竹棚」融入藝術中。

姊妹話，JR係以視錯覺藝術和大型攝影裝置而聞名，佢嘅Instagram至今已累積超過170萬粉絲，仲去過40幾個城市舉辦過逾80場展覽，展出地方包括法國巴黎羅浮宮及萬神殿、意大利羅馬法爾內塞宮、埃及吉薩的卡拉夫金字塔等。今次喺海港城展出嘅公共藝術裝置，係JR喺亞洲嘅首個GIANTS作品，預定3月中旬至4月下旬開放，黛安都好期待去開眼界啊！