《晴報》送窩心福袋 答謝派報員緊守崗位

無論晴天陰天，天氣有幾凍，《晴報》派報員每朝都會緊守崗位，熱誠地向每位上班族送上微笑和一句「早晨！」然後遞上一份《晴報》。黛安每朝返工前接到派報員哥哥或姐姐送上嘅報紙，都覺得份外溫暖和親切，佢哋嘅笑容帶畀大家滿滿嘅正能量！

《晴報》姊妹話畀黛安知，公司為咗答謝派報員努力工作，《晴報》特別準備咗一份窩心嘅禮物福袋送畀佢哋，一眾友好客戶都好踴躍咁贊助豐富禮品，包括：冬菇臘腸、食品飲品、防疫用品和保健產品等等，每位派報員都有份，人人都大豐收。噚日公司派發福袋嘅時候，派報員見到大大個福袋裝滿豐富嘅禮品同食品，每個人都笑得好開心，佢哋仲攞住福袋影大合照留念，齊齊滿載而歸，開開心心迎接新年。