尖沙咀中心帝國中心聖誕打卡賞 贏$50現金券

聖誕就快到，尖東一帶嘅聖誕燈飾自然成為打卡熱點。公關姊妹同黛安講，今年尖沙咀中心同帝國中心，特別以尖東燈飾歷年標誌性嘅「雪花」圖案為麼地里燈海嘅設計主題，中間嘅巨型雪花圖案散發濃厚復古味道，新設變色特效融合復古同現代感，帶嚟不一樣嘅經典感覺。

2間商場嘅4,000平方米巨型LED幕牆，仲設2段主題動態影像，分別以「飄雪音樂盒」及「40周年經典重溫」為主題，畀市民有機會回顧歷年經典燈飾，同時向本地燈飾設計師致敬。

為慶祝佳節，大家即日起至下月2日，只要去影低聖誕燈飾，並按指定步驟上傳至個人社交平台，即可參加「Snap & Share」聖誕打卡賞，換領$50指定商戶現金券。S⁺REWARDS會員更可於手機程式內新增設嘅FOODIE⁺專區，憑指定點數，獨家換領「開篷巴士夜遊尖東聖誕燈飾之旅及商戶禮遇」，暢覽尖東聖誕夜景燈飾。