荷里活廣場 屁屁偵探聖誕活動 下月起挑戰4大互動遊戲

鍾意屁屁偵探嘅朋友要留意喇，黛安收到風，荷里活廣場將打造全港首個屁屁偵探主題聖誕活動，11月4日至明年1月2日，屁屁偵探及一眾角色會放低工作，陪大家歡度聖誕，場內設4大互動遊戲，包括「屁屁偵探冰壺大挑戰」，4位參加者須輪流上場將冰壺推出，將自己嘅冰壺留喺比賽場地嘅紅色圓心之中，仲要設法將對方嘅冰壺撞走以獲最高分數，刺激又好玩。顧客喺場內即日以電子貨幣消費滿$200或VIC會員憑5積分，即可換入場券1張，遊戲勝出者有機會獲限定禮品㗎。

另外，場內亦設3大打卡位，例如屁屁偵探會以聖誕老人造型同助手布朗現身聖誕小鎮、「幸運貓咖啡店」嘅4米高聖誕樹及「屁屁偵探原稿展」；另有繪本限定店售賣屁屁偵探唔同系列嘅讀本、漫畫及繪本等圖書，粉絲記得去掃貨啊。商場更準備咗獨家限定嘅屁屁偵探「冬日保溫壺」、「2023年座枱月曆」及「聖誕填色套裝」，顧客憑即日電子消費或VIC會員憑積分就可換領，數量有限，先到先得！